Rev 8 | AAK | STEP | Bɨkwí̵namɨ tamɨxɨnɨŋí̵ yoparí̵pɨ arí̵kíáná re imóní̵agɨ wɨnɨŋanigɨnɨ. Aŋí̵namɨ ŋɨŋií̵á nimónárɨrɨ bɨ onɨmiápɨ e nemáná eŋáná

Revelation of John 8

Sipɨsipí̵ miáo bɨkwí̵yo tamɨxɨnɨŋí̵ yoparí̵pɨ arí̵kiŋí̵ nánɨrɨnɨ.

1 Bɨkwí̵namɨ tamɨxɨnɨŋí̵ yoparí̵pɨ arí̵kíáná re imóní̵agɨ wɨnɨŋanigɨnɨ. Aŋí̵namɨ ŋɨŋií̵á nimónárɨrɨ bɨ onɨmiápɨ e nemáná eŋáná 2 aŋí̵nají̵ Gorɨxoyá agwí̵rɨwámɨnɨ rogí̵á we' wí̵u'mɨ dáŋí̵ wau' imónɨgí̵áwamɨ pe'kákí̵ we' wí̵u'mɨ dáŋí̵ wau' wíagɨ wɨnɨŋanigɨnɨ.

3 Aŋí̵nají̵ ámɨ wo pɨrerɨxí̵ sí̵ŋá gorí̵ tí̵nɨ imɨxɨnɨŋí̵ wɨna í̵á nɨxɨrɨmɨ nɨbɨrɨ íráí̵ sí̵ŋá gorí̵ tí̵nɨ imɨxɨnɨŋí̵pɨ tí̵ŋí̵ e —Apɨ íkwiaŋwí̵namɨ agwí̵rɨwámɨnɨ onɨŋí̵pɨrɨnɨ. Apɨ tí̵ŋí̵ e e'í̵ róáná xwɨyí̵á ámá Gorɨxoyá imónɨgí̵á ní̵nɨyí̵ xí̵omɨ rɨrɨmí̵ wiarɨgí̵ápɨ —Apɨ íráí̵yo naŋwí̵ rɨdɨyowá yarɨgí̵ápí̵nɨŋí̵ weŋí̵pɨrɨnɨ. Apɨ tí̵nɨ nawínɨ rí̵á oikeaárɨnɨrɨ íkí̵á dí̵á rí̵á yeááná dɨŋí̵ naŋí̵ eaarɨŋí̵ xwe' bɨ mɨnɨ wíagɨ 4 aŋí̵najo e rí̵á ikeaáráná xegí̵ we'yo dánɨ íkí̵á dí̵ápiyá sinadɨŋí̵ tí̵nɨ ámá Gorɨxoyá imónɨgí̵á xí̵omɨ yarɨŋí̵ wigí̵ápɨ tí̵nɨ nawínɨ xí̵o sɨŋwí̵ anɨŋe peyíagɨ nionɨ sɨŋwí̵ nɨwɨnɨrɨ 5 aŋí̵najo pɨrerɨxí̵ sí̵ŋá gorí̵ tí̵nɨ imɨxɨnɨŋí̵na ámɨ nɨmearɨ rí̵kwamɨŋí̵ íráí̵yo weŋí̵pɨ nɨxerɨ pɨrerɨxí̵namɨ magwí̵ nɨyárɨmáná xwí̵áyo mamówárɨŋɨnigɨnɨ. Mamówáráná akɨrɨwí̵ rɨrɨ ikaxí̵ rɨrɨ ápiaŋwí̵ ókirɨ poboní̵ erɨ e'agɨ wɨnɨŋanigɨnɨ.

Aŋí̵nají̵ wau' wau' pe'kákí̵ rɨgí̵á nánɨrɨnɨ.

6 Aŋí̵nají̵ we' wí̵u'mɨ dáŋí̵ wau', pe'kákí̵ wa tí̵nɨ xɨxenɨ xɨrɨgí̵áwa pe'kákí̵ ranɨro nánɨ nimɨxárɨnɨmáná 7 wo iwamí̵ó pe'kákí̵ ráná re eŋɨnigɨnɨ. Aŋí̵naíkí̵ tí̵nɨ rí̵á tí̵nɨ ragí̵ tí̵nɨ nawínɨ xwí̵áyo pie'róáná xwí̵á nɨrínɨ biau' bɨ eŋí̵pɨ bí̵bimɨ eŋí̵yí̵ amɨpí rí̵á nɨnowárɨrí̵ná ará ní̵nɨ nɨnɨrɨ aí íkí̵á orɨwámɨ dánɨnɨ nepeárí̵agɨ wɨnɨŋanigɨnɨ.

8 Aŋí̵nají̵ ámɨ wo pe'kákí̵ ráná re e'agɨ wɨnɨŋanigɨnɨ. Bɨ dí̵wí̵ mɨŋí̵ xwe' ápiáwí̵ wearɨŋí̵pí̵nɨŋí̵ imónɨŋí̵pɨ rawɨrawáyo mamówárɨnáná rawɨrawá ní̵nɨ biau' bɨ imónɨŋí̵pɨ bí̵bɨ apɨ nɨpɨnɨ ragí̵ imónɨrɨ 9 naŋwí̵ amɨpí rawɨrawáyo yarɨŋí̵yí̵ ní̵nɨ biau' bɨ eŋí̵pɨ bí̵bɨ pɨyí̵ erɨ ewe' amɨpí rawɨrawáyo warɨŋí̵yí̵ ní̵nɨ biau' bɨ eŋí̵pɨ bí̵bɨ xwɨrí̵á ikɨxe'nɨrɨ e'agɨ wɨnɨŋanigɨnɨ.

10 Aŋí̵nají̵ ámɨ wo pe'kákí̵ ráná re e'agɨ wɨnɨŋanigɨnɨ. Siŋí̵ xwe' wo —O xegí̵ yoí̵ Yíkí̵ Yarɨŋoyɨ rɨnɨŋorɨnɨ. O uyí̵wí̵ wɨrí ápiáwí̵ nɨwerí̵nɨŋí̵ aŋí̵namɨ dánɨ nɨpie'rorí̵ná iniɨgí̵ wearɨŋí̵yí̵ tí̵nɨ sɨmɨŋí̵ meaarɨŋí̵yí̵ tí̵nɨ ní̵nɨ biau' bɨ imónɨŋí̵yí̵ bí̵bimɨ pie'róáná apɨ nɨpɨnɨ yíkí̵ imónɨŋɨnigɨnɨ. Ámá iniɨgí̵ apimɨ nɨnɨróná yíkí̵ imónɨŋagɨ nánɨ obaxí̵ pe'agí̵a wɨnɨŋanigɨnɨ.

12 Aŋí̵nají̵ ámɨ wo pe'kákí̵ ráná re e'agɨ wɨnɨŋanigɨnɨ. Sogwí̵ pí̵rí̵ rakínɨrɨ emá pí̵rí̵ rakínɨrɨ siŋí̵ pí̵rí̵ rakínɨrɨ e'agɨ nánɨ ikwáwɨyíná biau' bɨ imónɨŋí̵pɨ bí̵bimɨ dánɨ sí̵á nɨyinárɨrɨ sogwí̵ manɨpa erɨ árí̵wɨyíná biau' bɨ imónɨŋí̵pɨ bí̵bimɨ dánɨ enɨ sí̵á nɨyinárɨrɨ emá tí̵nɨ siŋí̵ tí̵nɨ wí̵á mókipa erɨ e'agɨ wɨnɨŋanigɨnɨ.

13 Nionɨ ámɨ wenɨŋí̵ e'áyí̵ apurí̵ wo aŋí̵ pɨrí̵namɨ ayá áwɨnɨyo nɨpurí̵ná eŋí̵ tí̵nɨ re rarɨŋagɨ arí̵á wiŋanigɨnɨ, “Ine, aŋí̵nají̵ awa wau' wo yoparowa, rɨxa pe'kákí̵ nɨrɨpí̵rɨ nánɨ imónɨŋoɨ. Awa ráná ámá xwí̵áyo ŋweagí̵áyo wímeaní̵pɨ nánɨ ine! Ine!” rarɨŋagɨ arí̵á wiŋanigɨnɨ.